21 feberwaori – 17.00 – Ik hebbe de nustkassies uutredded. In de iene was bewoning west, in de aandere niet... Ik hope dat ze vandemeitied allebeide deur de mesies bewoond wodden! Ik vraoge gien hure!
Gister- en vandemiddag he’k een aentien fietst. Et is vanzels wonderbaorlik... Zowat dattig graoden verschil mit et veurige weekaende. Dit komt vanzels op ’e kop verkeerd mit de klimaotveraandering. Dat is een ding dat zeker is. Gister he’k naor aachterneve/iemker Piet in Wolvege west om acht potten hunning op te haelen. Alderhaande soorten, ok hunning uut Ni’jtriene! We hebben butendeure op voldoende ofstaand even staon te praoten. Ik zag al iene in de kotte broek lopen en hier op ’e hoeke in et dörp zatten al fietsers op een baankien te bekommen. Vandemiddag he’k Der Izzerd ommefietst en een peer liende boeken bi’j Koosje in de busse stopt. In de busse zat weer een boek veur mi’j da’k mitneumen hebbe. Et blift de hiele weke trouwens mooi veurjaorsweer. En toch... vleden weke lag alles nog onder de sni’j. Onbegriepelik! Nog even een peer foto’s van dat mooie wintertien. Johan en Gertie stuurden me disse mooie foto’s toe uut Twente. De foto’s bin maekt bi’j Hoeve Springendal vlakbi’j Ootmarsum. Ik bin vusen te lange al niet meer in dat mooie Twente west...

Naor de volgende bladziede - Naor de veurige bladziede