11 jannewaori – 17.30 – Een hiele inkelde keer droom ik mooi. Zoas vannaacht. Ik stapte noordelik van Wolvege mit een groepien aandere meensken in een botien. We veerden naor een onbewoond eilaand in de Waddenzee. Doe we nog mar krek op ’e zee weren, stak d’r een verschrikkelike storm op. Et wodde donker en et regende as de... zee. Et was as de testementische veertocht op et Meer van Galilea... Mar gieniene was bange, gieniene begon te gillen. En doe was de storm zomar inienend veurbi’j, de zunne brak deur en we weren op et eilaand. Ik stapte op et straand. ‘Wat is dit mooi,’ zee inienend iene aachter me. Et was mien moeder. De aandere meensken weren nargens meer te bekennen. Et was inderdaod mooi, mien moeder hadde geliek. Et was een vlak eilaand en in de veerte ston een groepien palmbomen. Mien moeder en ik op een onbewoond eilaand. En doe scheut ik wakker, was et twintig menuten over viere en kon ’k niet meer in de slaop kommen.
  Vleden jaor op 6 meert, vlak veur de eerste lockdown, wa’k mit Harry een dag op et eilaand Texel. Vandemiddag biwwe niet naor een eilaand west... We hebben bi’jpraot en hier een kuier maekt deur de bos op ’e Zanen en naor et netuurbelevingspunt bi’j de Lende. En nao de kuier he’k him trakteerd op een gebakkien.
  Et was vandaege gien dag om foto’s te maeken. Daoromme hieronder nog twie foto’s van eregister in park Klarenbeek in Arnhem. Links: disse ponnie wol graeg deur me aaid wodden. Rechts: op petret mit Elroy en Roelien.


Naor de volgende bladziede - Naor de veurige bladziede