24 juni – 17.00 – Et ni’je boek is d’r! De spannende literaire thriller Et
liek in de Lende is gister deur de drokker ofleverd bi’j de Stellingwarver
Schrieversronte in Berkoop. De eerste thriller in et Stellingwarfs en misschien
ok wel de laeste... Wie zal et zeggen... Ik bin d’r gister votdaolik hennegaon
en hebbe et hiele boek konterleerd. Sluten alle bladzieden op mekeer an? Alles
klopt! Et boek zicht d’r prachtig uut in een had kaft mit een leeslint. De
verkooppries is mar 15,95 euro. Jim kun et boek vanof now bestellen op dit
webstee. Klik bi’j Bestellen.
Bestelde boeken breng ik gratis rond in de Stellingwarven. Butendat ok in Et
Vene. Ik hebbe daor al een peer bestellings. Omdat ik ok wat bestellings in
Drachten hebbe, breng ik et daor ok rond. In de weke veur de prissentaosie van
et boek (9 juli) reis ik alderhaande boekwinkels in Frieslaand of om die heur
bestellings te brengen: Wolvege, Oosterwoolde, Noordwoolde, De Gediek, Burgum,
Liwwadden. Et Vene, De Jouwer... En
dan doe ’k die bestellings van pattekelieren d’r in iene reize bi’j. Ik
trekke d’r drie daegen veur uut. De thriller is vanzels ok bi’j de
Stellingwarver Schrieversronte in Berkoop te kriegen en bi’j mi’j thuus in
Ni’jhooltpae. Et is een dik boek wodden: 256 bladzieden. Et kan dus niet deur
de brievebusse. We kun van teveuren ofpraoten wanneer a’k langeskomme. Aanders
breng ik et bi’j de buren an en vraog ik vrundelik as die et even deurgeven
willen. Aandere bestellings wo’n as pakkettien op ’e post daon! Et
ni’je boek is d’r!
Naor de veurige bladziede
