16 september – 18.00 – Et slim hiete weer is over, ik kon gisteraovend haost niet in de slaop kommen van de hitte, mar et is nog heerlik fietsweer. Even veur elf ure biwwe vandemorgen begonnen an een al weer prachtige tocht. Eerst van Groet naor Schoorl en doe deur de dörpen Schoorldam, Waarmerhuzen,Tuitjenhorn, Riep, Stroet, Sunte Matten, Sunte Mattensbrogge, Sunte Mattensvlotbrogge en Sunte Mattenszee daor de Friese schriefster Hylkje Goïnga altied vekaansie hul. Vandaor op ’e fiets naor Callaansoge en doe sleug et noodlot toe. Jelle raekte een trapper van de fiets kwiet. We konnen him d’r niet meer ankriegen en hebben de fietseman beld. Eerst hewwe twie kilemeter mit de fietsen an de haand lopen en doe kwam de man mit een bestelbussien en het hi’j de boel rap maekt. Prima service! In Callaansoge hewwe luncht op et terras van brasserie Brasil. En doe raekten we mekeer midden in et dörp kwiet. De iene sleug linksof, de aander rechtsof. We wussen mekaanders 06-nommers ok niet… En we hadden ok gien geweer bi’j oons om lochtkoegels ofschieten te kunnen. Nog krek niet goelende vunnen we mekeer weer… Van Callaansoge biwwe weer naor Sunte Mattenszee fietst en doe et schitterende fietspad deur de dunen naor Petten. Van Petten naor Caamperduun over et fietspad bi’j de zee langes en doe weer naor Groet. Daor hewwe naor de Spar west en doe hewwe de beide fietsen inleverd. Et was een prachtige dag! Hieronder twie foto’s van vandaege. Links et karkien van Sunte Mattensbrogge. Rechts: et karkien van Callaansoge.


Naor de volgende bladziede - Naor de veurige bladziede