15 september – 17.00 – We bin gister om elf ure vanuut Sneek naor oons vekaansieadres gaon. In Petten hewwe schoft hullen. Daor hewwe in straandpaviljoen Zee en Zo lekker eten en wat dronken. En… we hebben daor op blote voeten deur et zeewaeter banjerd. Wat was et overal drok mit dit mooie
weer. Et was een toer om een plakkien veur de auto te vienen. In Groet hewwe naor de Spar west en doe naor oons prachtige husien Jesper van vekaansiepark Carpe Diem! Een prachtig onderkommen! Hier redden wi’j et wel op! Tillefonisch he’k veur vandaege en woensdag elektrische fietsen besteld. Aovens biwwe et woeste naachtleven van Groet in west…

Vandemorgen hewwe een Stellingwarver vlaggien an de butermure hongen, now weten de Duutsers, die hier naost oons wonen, temeensen waor we wegkommen. Om goed half elven biwwe naor de fietseman kuierd om oonze fietsen op te haelen, die we twie daegen bi’j oons holen kunnen. We hadden ok een fietskaorte, mar binnen de kotste tied wawwe et spoor biester. We misten nommers en botties… Netuurlik lag dat niet an oons! We hebben doe zomar een prachtige fietstocht maekt. Deur de bossen naor Bergen/Bargen. Daor hewwe luncht op et terras van hotel Studlers. Vervolgens deur de wondermooie Schoorlse dunen. En wat was et overal drok mit fietsers! In Caamperduun hewwe hoge in de dunen op et terras van resteraant Struin een bakkien drinken en heerlik gebak had. We jaegen d’r flink wat centen deurhenne. Doe biwwe bi’j de kust langesfietst en vervolgens deur et vlakke poolderlaand weer naor Groet. Een prachtige tocht mit et mooiste weer van de wereld. Hieronder twie foto’s van vandaege. Links: mit disse poes he’k even praot op et terras in Bergen/Bargen. Rechts: wit huus mit meule in et poolderlaand. Over honderd jaor zal dit allemaole meters onder waeter staon en bin de Hollaanders klimaotvlochtigen. Mar dan jokken oons de koezen niet meer!


Naor de volgende bladziede - Naor de veurige bladziede