14 september – 9.00 – Ik stao op et punt om vot te gaon. Toch nog een peer daegen vekaansie… Ik bin d’r hiel arg an toe. Ik gao now naor Sneek, naor Jelle en Gerda. Daor drinken we eerst nog wat en dan gaon Jelle en ik op stap. We gaon naor vekaansiepark Carpe Diem in Groet. We zitten daor in et husien Jesper dat, wonderlik genoeg, krek buten et park ligt, he’k begrepen. Et wodt et mooiste zoemerweer waj’ je mar veurstellen kunnen, dat we zullen zeker fietsen huren om daor lekker fietsen te kunnen. En we zullen ok grif mit de blote voeten in et zeewaeter ommeploempsen. En we blieven bi’j meensken uut de buurt, want de korona-ellende is echt nog lange niet veurbi’j. Et is de bedoeling da’k elke dag wel veur een dagboekstokkien zorge. We hebben wifi in et husien en ik hebbe de laptop mit, mar ik bin een grote klongelkont wat techniek anbelangt. Et moet me dus allemaole mar lokken…

13 september – 17.00 – Vandaege he’k nog een lekkere fietstocht maekt van een goeie vuuftig kilemeter. Bi’j de Lende langes naor de Driewegsluus. Op et terras he’k daor lekker wat eten. Een heerlik twaelfuurtien. Ik hebbe mien route vervolgd over de Scheenesluus en deur de Braandemeer. Onderwegens he’k nog wat peren opscharreld. Dit kan hier vanzels wel es de laeste fietstocht van dit jaor west hebben. Et wodt disse weke prachtig weer, mar dan fiets ik argens aanders! En daornao moe’k naor et ziekenhuus en kan ’k niet fietsen. En daornao… kan et wel es echt haast en et mooie fietsweer over wezen. Mar… et kan in oktober netuurlik ok nog wel prachtig weer wezen… Ie weten et nooit… Ik hebbe in Wolvege nog even naor de supermark west, zoda’k me een schoffien redden kan a’k weer thuus bin. Ik hebbe ok wat kaant en klaor spul insleugen, want ik kan me veurstellen da’k nao de vesite an et ziekenhuus even gien nocht hebbe om naor de winkel te gaon en eten klaor te maeken. De tasse staot now inpakt klaor… Hieronder nog een foto van vandaege. De Lende in et ooldewievezoemertien van 2020.


Naor de volgende bladziede - Naor de veurige bladziede