10 juli – 17.00 – D’r bin van die daotums die altied in je onthoold zitten blieven. Et is vandaege 57 jaor leden da’k slaegde veur et ulo-examen. As ze me doe zegd hadden da’k 57 jaor laeter in mien internetdagboek schrieven zol da’k 57 jaor leden slaegde veur et ulo-examen… Ik zol gien idee had hebben wat et woord internet betekende.
  Gister he’k dus weer nao vier maonden mien trein- en museumkaorte bruken kund. In de veurige periode van twaelf maonden he’k van beide kaorten ommeraek plezier beleefd. Wat de treinkaorte anbelangt… Ik bin doe zeuven keer op die kaorte mit de trein west naor Assen (3x), Zwolle, Amsterdam (2x) en Liwwadden. A’k iederkeer kaorties kopen moeten hadde wa’k 222 euro kwiet west. De kaorte kostte me 92,50 euro. Een veurdiel van 129,50 euro. En wat de museumkaorte anbelangt… Die kostte me 59,90 euro. Ik bin op die kaorte in 25 museums west. A’k  iederkeer kaorties kopen moeten hadde wa’k 253 euro kwiet west. Een veurdiel van 193,05 euro. In de volgende plakken wa’k in een museum: Zwolle, Burgum (2x), Assen (2x), Liwwadden (3x), De Harkema, Veendam, Amsterdam (2x), Noordwoolde, Grunningen, Muden, Naarden-Vesting, Hattem (3x), Doesburg, Ter Apel, Appingedam, Ooldeschild, Arnhem en Velp. Van de ni’je kaorten za’k vanwege de koronakrisis lange niet zovule perfiet hebben. We liggen an banen en kun niet goed doen wawwe graeg willen. Mar disse maond wi’k zeker nog een keer mit de trein naor de ongetwiefeld prachtige tentoonstelling Koele wateren in et Hannemahuus in Harlingen.
  Hieronder nog een foto van gister uut Museum Martena in Franeker. De foto he’k niet zels maekt, mar komt van internet. Dit bin de prachtige en hiele grote schilderings mit gezichten op Oostermeer van Gosse Koopmans.


Naor de volgende bladziede - Naor de veurige bladziede