29 juni – 17.00 – Ik kreeg mooie foto’s toestuurd van mien goeie vrunden Johan en Gertie, Stellingwarvers in de vremde uut Almelo. Zi’j vieren vekaansie in Twente. Now ja, waor is et mooier as in Twente? Aj’ daor wonen bi’j’ in wezen altied op vekaansie. Et gaot heur trouwens percies as mi’j en zo zal et alle keunsteners wel vergaon. As ik uut fietsen bin zie en heur ik van alles wa’k in mien verhaelen bruken kan. Johan krigt as jazz-musikus en kompenist onderweg idenen veur kompesisies. En Gertie maekt as ze weer thuus binnen de prachtigste warkstokken van wat ze onderwegens zien het. Hieronder vier foto’s. 1. Op ’e schilderi’jen van oonze Hollaanse laandschopsschilders uut de zeuventiende ieuw bin al koenen te zien die lekker in et waeter van een poele, vennegien of reviertien ommeploempsen. Krek as meensken bin koenen deur de ieuwen henne niet veraanderd. Op ’e foto een appatte koe in et Springendal. 2. Dit bin drie Lakenvelder koenen bi’j Vasse. Disse drie koenen zorgden veur een protte inspiraosie. Johan maekte de kompesisie Three Lovely Lakenvelder Ladies. Wat een mooie titel! Gertie maekte prachtige warkstokken en verbeelde de Three Lovely Lakenvelder Ladies op een keunstzinnige meniere. Zie de foto’s 3 en 4. Ik vien dit prachtig wark! Gertie kreeg op 20 oktober 2018 de Herman Krikhaar Prijs veur heur wark. Een stokmennig zinnen uut et juryrappot: Subtiel verstillend, tegenbeweging van de haast en pleidooi voor de rust. (...) Het werk zit tussen abstract en figuratief en met gebruik makend van ongewone materialen. (...) Serene verstilling van de natuur, een signaalwerking van een aarde die wordt verpest. (...) Minimalistisch met een beeldende kracht. (...) Hoe langer je kijkt hoe meer diepte je ziet, het blijft facineren.


Naor de volgende bladziede - Naor de veurige bladziede