13 jannewaori 17.00 Nao vuuf goeie en fitte daegen hek sund gister toch weer wat hinder van de burn-out-klachten. Et is vervelend... Ik bin vandemiddag mar even op e fiets naor Berkoop west.
 En dan nog over et dagboekstokkien van gister... De veurzitter van de Nederlandse Vereniging van Postzegelverzamelaars van het Vorstendom Liechtenstein is Jan Landman die now in Hadderwiek woont, mar van Wolvege komt. Hij is de zeune van Gerrit Landman, die lerer op e ulo was. Ik hadde daor geschiedenis van; mien lievelingsvak. Jan Landman zien beste kammeraod is Paul Wouda, de zeune van de dokter. Daor zat ik in de dadde klasse naost. Hij was populair, hij was alles wat ik niet was. Mar ik hadde goeie ciefers op mien proefwarken geschiedenis. Ik legde mien pepier zo dat hij mien antwoorden half en half lezen kon. Et verget me nooit dat Landman op een keer de proefwarken weer uutdielde en zee: Johan Veenstra een acht en Paul heeft dus ook een acht. De man zal et zels wel vergeten wezen of verdrongen hebben, mar ik wete et nog hiel goed. Ik vergete niet gauw wat! Paul Wouda woont al hiel lange in Liechtenstein. Op 15 augustus is daor de nationaole feestdag. De Stellingwarvers bin daor geregeld bij op et terrein van Schloss Vaduz. De vostelike femilie lopt dat gewoon wat tussen de meensken omme en maekt hier en daor een praotien. Hieronder een foto van 15 augustus 2010. Die foto komt van de webstee van de NVPVL. Links Jan Landman en in et midden Vost Hans Adam II. Die is in naeme nog altied staotsheufd van Liechtenstein, mar de daegelikse warkzemheden won al jaoren daon deur zien ooldste zeune arfpreens Alois. Hij is in wezen regent van et vostendom, mar wodt pas vost as zien vader wegraekt.


Naor de volgende bladziede - Naor de veurige bladziede