12 jannewaori – 17.00 – Hieronder een mooie en ok slim biezundere anweenst veur mien postzegelverzaemeling. Dit vellegien postzegels is uutgeven deur PostNL in opdracht van de Nederlandse Vereniging van Postzegelverzamelaars van het Vorstendom Liechtenstein (NVPVL). En dat omdat et zelsstaandige vostendom Liechtenstein driehonderd jaor bestaot en omdat d’r banen binnen mit et Huus van Oranje. Op ’e postzegel staot et petret van Willem VI, de zeune van oonze laeste stadhoolder Willem V, oonze laetere keuning Willem I. Stadhoolder Willem V mos in 1795 vlochten naor Engelaand en hier wodde de Bataafse Rippebliek uutreupen. De meensken daansten om de vri’jhiedsboom. Vri’jhied, geliekhied en broederschop. Zo zol et wezen! Nooit gien Oranje meer! Dat daansen duurde niet zo lange. De rippebliek ston onder Fraanse invloed. In 1806 wodde de rippebliek ofschaft en stichtte Napoleon hier et keuninkriek Hollaand mit zien breur Lodewiek Napoleon as keuning. Die dee et trouwens hielemaole niet zo slecht! Mar ok dat duurde niet zo lange... In 1810 wodde Nederlaand een onderdiel van et keizerriek Frankriek. Stadhoolder Willem V hadde al zien bezittings hier verleuren. Napoleon kompenseerde him deur him de soevereiniteit over een stokmennig kleine gebieden te geven. En... daor was de proosdij Bandern in Liechtenstein ok bi’j. Willem V gaf die bezittings deur an zien ooldste zeune. Vandaor dat et karkien van de proosdij en arfpreens Willem op ’e postzegel staon. Doe Napoleon bi’j Waeterloo versleugen wodde, kwam Oranje weeromme en wodde de arfpreens oonze keuning Willem I. Morgen meeer... want de veurzitter van de NVPVL is een Stellingwarver uut Wolvege. En zien beste kammeraod, daor ik vroeger op ’e ulo naost in de baank zat, woont in... Liechtenstein.


Naor de volgende bladziede - Naor de veurige bladziede