11 jannewaori 17.00 Een peer daegen leden kreek de vraoge ak ok kotte verhaelen en/of gedichten over de oorlog schreven hadde. Now, de oorlog komt riegelmaotig in mien wark veur. In ieder geval in meerdere romans. En in De boot naor Valhll staot et lange verhael De jaordag van de keizer. Ik hebbe uutzocht ak ok wat kot spul over de oorlog hebbe. In ieder geval et gedicht Liek as Levi uut De toren van De Lichtmis (1988). En vanzels et verhael Bericht van Tiemen uut Fluitekruud (1977) en Zulvergoed uut Mit et waeter veur de dokter (2012). Dat laeste verhael hak nog wel in de komputer zitten. Et gedicht en Bericht van Tiemen hek opnij uuttikt. Et verhael hek hier en daor wat wiezigd. Et is meer as veertig jaor leden dak dat schreef. Ik zol et now toch wel wat aanders doen... Misschien komt dr wat van dit spul in een nij boek, want et is van t jaor 75 jaor leden dawwe weer vrij wodden binnen. Wat en hoe kan k en mak veerder nog niks van vertellen. Mar as et wat wodt, heuren jim dat ongetwiefeld van me.
  Op e tillevisie hek verschillende films zien over heufdinspekteur Kurt Wallander. Ik bin een groot fan van Wallander! Mar now pas hek veur de eerste keer een boek van Henning Mankell over Wallander lezen: Honden van Riga. Wat een mooi en spannend boek! Op een winterse dag spoelt een rubbervlot mit twie dooie mannen an op e kust van et Zweedse Skne. Veurdat ze doodmaekt binnen, bin ze matteld. Een spoor leidet Wallander naor de Letse heufdstad Riga. Daor komt hij in duustere zaeken terechte... Et is now meer as dudelik dak alle boeken over Wallander lezen moet!


Naor de volgende bladziede - Naor de veurige bladziede