2 jannewaori – 17.00 – D’r kwammen een peer reakties op et dagboekstokkien van gister. Ik mag nooit meer zo onveurzichtig wezen! Ik belove hierbi’j dan ok plechtig da’k zoks nooit meer doen zal!
  Gister he’k de negen ammarillen uut et donker haeld, ze ni’je potgrond en waeter geven. De meersten krie ’k ieder jaor weer in de bluui. Ik bin beni’jd wat et dit jaor wodden zal. Ik zal ze goed verzorgen en d’r tegen praoten. Dan moet et toch weer lokken, zoj’ zo zeggen.
  Ik bin et jaor goed begonnen. Vandemorgen bin ’k in Wolvege lid van de biebeltheek wodden. As kiend wa’k indertied et eerste jeugdlid van Ni’jhooltpae. Doe wodden de anvraogde boeken in een kiste ofleverd in de legere schoele. Laeter kwam de boekebus langes. En doe bin ’k gewoon niet langer lid bleven. Ik hebbe altied wel een boel boeken kocht en lezen. Now a’k aanst nog mar hiel weinig optredens meer hebbe en d’r gien nocht meer an hebbe en doe mar van alles veur iederiene he’k vule meer tied over om te lezen. Dat daoromme bin ’k now weer lid wodden en ik hebbe drekt twie literaire Scandinavische thrillers mitneumen.
  Vandemiddag he’k et dörp even ommefietst. Ik bin now al weer drie weken licht in ’t heufd en zo. Hiel vervelend. Et knapte aanders zo mooi op... Misschien is wat meer frisse locht wel goed... Ik bin slim an mooi meitiedsweer toe!

1 jannewaori – 17.00 – Ik bin vandemorgen om goed tien ure veilig weer thuuskommen en dat is eins een groot wonder, want ik hebbe gisteraovend echt een levensgeveerlike tocht maekt. Stom, stom, stom... Doe ’k om goed zeuven ure van huus gong, was et tot mien verwondering inienend al hiel arg mistig. Op ’e Karkelaene kon ’k et al haost niet meer zien. Ik besleut tot de Stellingenweg an toe te rieden en dan weeromme naor huus te gaon. Et was onverantwoordelik en gao veerder. Dat he’k daon, mar bi’j de karke bin ’k toch weerommedri’jd. Ik zag een peer auto’s op ’e grote weg rieden. Ik mos toch werachtig wel in Et Vene kommen kunnen! Dat he’k weten... Tot Wolvege ree ik mit 50 km in et ure aachter een peer auto’s an. Dat gong goed. Op ’e vierbaensweg naor Et Vene gong et ok nog beheurlik. Mar... d’r vleug me al een auto mit blauwe lochten en sirene’s veurbi’j. Ik vun de ofslag naor Et Vene-Zuud ok nog goed. Mar doe kwam de grote ellende. Ik zag haost niks meer. Bi’j Batavus raekte ’k van de weg of, de baarm in. Even veerderop kon ’k weer aachter een peer auto’s anrieden, mit 20 km in et ure krummelden we deur Et Vene. Dat lokte tot de rotonde daor a’k ofslaon mos naor de woonwiek daor Haarm en Jacob wonen. Ik wus nog altied waor a’k was, mar zag niks meer. Op die rotonde gong et mis. Ik zag de weg niet daor a’k in mos en raekte over een trotwarbaand henne toch op die bewuste weg. Daor ston een auto, mit meensken die d’r ok kompleet mit an weren. Ien van die meensken leup doe veur die auto uut. Ik ree mar aachter dat spul an. Ik zag niks meer. Ik besleut mar deurrieden te blieven tot die auto ooit een keer stoppen zol. Dat gebeurde op een bepaold ogenblik. Ik hebbe die meensken vraogd waor a’k in hemelsnaeme was... Zi’j hadden vot zuld, mar weren bi’j die rotonde dus weerommekeerd naor huus toe. Ik moch de auto daor op een oprit bi’j een vrouw zetten. En doe is een vreselik aorige man mit Duuts aksenst mit een lanteern lopende mit me naor et huus van Haarm en Jacob gaon, die ongerust zatten te waachten. We hoefden mar 200 meter te lopen... A’k die meensken niet troffen hadde ha’k de naacht misschien wel in de auto deurbrengen moeten. Ik hadde Haarm en Jacob wel bellen kund, mar hadde nooit zeggen kund waor a’k was... Ze hadden me niet vienen kund. Now ja, ik hadde bi’j wildvremde meensken anbellen kund vanzels. Ik was slim onverstaandig west en gao van huus. Al mit al he’k een ure wark had en komme te plak. Mar... we hebben een mooie aovend had mit Claudia de Breij die die kerel van de SGP best anpakte. Hulde! Naodat et in Londen ok ni’jjaor was biwwe op bedde gaon. Et vuurwark was praktisch niks van te zien. Nao et broodeten he’k vandemorgen de auto weer opzocht en bin ’k weer naor huus gaon. Disse tocht zal me altied bi’jblieven!

Naor de volgende bladziede - Naor de laeste bladziede 2019