5 december 19.40 Ik bin weer thuus nao twie prachtdaegen mit mooi weer! We bin hier gistermorgen om half achte weggaon naor Mestricht. Onderwegens hewwe in Malden wat drinken en lekker gebak had in een wegresteraant. In Mestricht hewwe de auto in een parkeergerage bij de Maas zet en doe biwwe de stad inkuierd. We hebben winkeld en de St. Servaes en de OLV-karke van binnen bekeken. In die laeste karke hewwe ieder een keersien opsteuken. Ie weten nooit waor zoks goed veur is. Op et Vrijthof hewwe de enorne kastmark bekeken en we hebben wat dronken en eten op et verwaarmde terras van Fameuse, een resteraantien an et Vrijthof. We hebben disse beide daegen altied op verwaarmde terrassen eten! Om half vufe wawwe in hotel Van der Valk en we kregen daor kaemer 312. Om half zeuven biwwe weer mit de auto naor de binnenstad reden en we bin weer naor de kastmark op et Vrijthof gaon. Prachtig mit al die lochies! Et was dr drok. En... ik hebbe wat daon wak nooit van mezels verwaacht hadde dak ooit doen zol. We bin tegere in et reuzerad gaon. Tsja, aj een stoere man bij je hebben die zoks mooi vint, dan doej wel es wat. Eerst mit de ogen dichte, mar doe los. Ik hebbe mar wat in de veerte keken en niet pal onder me. Wat een belevenis! Ik overwege now de achtbaene en parrechutespringen... We hebben gisteraovend eten op et terras van Old Dutch an et Vrijthof. Heerlik! Nao nog een slag over de kastmark biwwe weer naor et hotel reden. Vandemorgen biwwe nao et eten om half tiene weer in de auto stapt en naor Valkenburg reden. Daor hewwe de hiele dag ommebeinseld. Van half november of is Valkenburg in kastsfeer en is et dr hatstikke drok. We hebben de stad bekeken en de kastmarken in de Flewielgrot en de Gemientegrot. Wat een grote kastmarken! Onveurstelber! We hebben halverwege de middag eten op et terras van resteraant Bombario. Om half viere biwwe daor weer in de auto stapt en naor huus reden. En now bin k hier weer... Hieronder twie fotos van twie prachtdaegen. Links: Et OLV-plein in Mestricht. Rechts: Valkenburg an de Geul.


Naor de volgende bladziede - Naor de veurige bladziede