8 oktober – 17.00 – D’r ston vandaege een mooie receensie over De tael van et hatte in et Friesch Dagblad. Een peer zinnen uut et kraantestok. Met de opdracht van het Under de toer-project de kernwoorden: mienskip, de toer en Europa te gebruiken, zijn regisseur Gooitsen Eenling, schrijver Johan Veenstra en vele anderen er in geslaagd een bescheiden doch groots gebeuren qua vorm te realiseren. En... De drie dorpen Ter Idzard, Olde- en Nijeholtwolde hebben onder artistiek leider Sigrid Hamelink een mooi monument opgericht voor zichzelf en de ander. Ze kunnen trots zijn.
  Ik bin gister staorigan begonnen mit et schrieven van et achttiende heufdstok van de roman De rooie griffioen. Vandemiddag he’k d’r ok wat an daon, mar now et de kommende daegen weer prachtig weer wodt, lao’k et schrieven liggen en gao ’k fietsen! Vandaege het tuunman Arjen de tuun een goeie beurt geven. Alles is now weer slim netties om huus henne! Ik hebbe ok nog wat zute appelties weckt en peresjem maekt! De winter kan mar kommen! En now za’k naor Fokje toe te eten.

7 oktober – 17.00 – Hanso Idzerda, een ofstammeling van jonker Baerte het de orgenisaosie van De tael van et hatte weten laoten dat hi’j en de vrouw enorm geneuten hebben van de veurstelling. In zien mail schrift hi’j van een uitstekend concept, excellente tekstschrijvers en zeer gemotiveerde acteurs. Een mooie reaktie! Ik hebbe vandaege op verzuuk een stokkien schreven over De tael van et hatte veur ’t Kontakt, et dörpsblad van Der Izzerd, Hooltwoolde en Ni’jhooltwoolde. Vandaege he’k ok een hiele protte wark daon dat de laeste daegen liggen bleven was deur alle drokte op Der Izzerd en De Fochtel.
  Gister was naemelik de vierde Dag van de Prentkeunst in et Centrum veur Prentkeunst van de Stichting Nobilis op ’e Fochtel. Ik was daor de hiele dag, hebbe morgens eerst een vrouw bi’j een bushalte in Appelsche weghaeld en hebbe doe iederkeer hulpen om boeken en prenten te verkopen. D’r wodde een tentoonstelling eupend mit wark van Antje Veldstra. Butendat kwam d’r een boek van heur uut daor aj’ ok een mooie prente bi’j anschaffen konnen. Pieter Jonker hul twie lezings: iene over Jan Battermann en iene over Toon Wegner. Tal van grafici vertoonden heur keunsten in et dörpshuus. Daor kon ok ruild en kocht wodden. Ik hebbe dattig prenten van poezen kocht en ok nog mythologie ruild en kocht. Et was een drokke mar mooie dag. Et was d’r de hiele dag deur slimme drok. Omdat een meens niet alles kan, bin ’k nao ofloop niet mit west veur et diner in et Witte Huus in Donkerbroek. Hieronder een foto van gister. Tal van grafici leuten heur wark zien in et dörpshuus.


Naor de volgende bladziede - Naor de veurige bladziede