13 juni 17.00 We hebben et gisteraovend slim gezellig had mit G in Fleringen en we hebben heerlik eten. Om ongeveer tien ure wawwe weer thuus.
  Vandemorgen biwwe om even veur achten van bedde kommen. Even laeter kwam moederknien onder de pollen weg en doe ien van de kienderknienen. Moeder en kiend drokten de neuzen even tegen mekeer an. Krek as gistermiddag was et hier vandemiddag 19 graoden, dat we beinselen hier altied in de kotte broek omme.
  Om goed half elven biwwe naor kesteel Twickel in Delden reden. Et kesteel is mar een peer keer in et jaor van binnen te bekieken en dat is vandeweke et geval! Een butenkaansien! Om twaelf ure biwwe mit een groep van ongeveer dattig man et kesteel ingaon. Dr bin vandeweke meerdere rondleidings per dag. We bin opsplist in twie ploegies van 15 man. Een vleugel van et kesteel wodt bewoond deur de grafelike femilie Castell. Wat een prachtig kesteel! Wat zicht alles dr mooi uut. En dan de keukens beneden in et kesteel mit al dat blinkende keuper en die enorme kachels. En wat een goeie rondleidster! Wat vertelde die mooi over et kesteel en de bewoners. De rondleiding duurde vuuf kertier. In de laandschopswinkel van Twickel wodde k herkend deur een jonge vrouw! Dat was Sara Rootveld uut Bornerbroek. Heur vader en moeder ken ik goed. Heur vader, Fred Rootveld, het indertied de cd Lendelaand van et duo Vroukje en Jeannette en mij uutbrocht. Wat een aorige ontmoeting! Nao Twickel hewwe in resteraant t Oaldershoes in Delden wat eten en we hebben een kuier deur et stattien maekt. Vervolgens biwwe weer naor Twickel gaon en hewwe de kwekerije De Border bekeken. Wat een prachtig bluuiende rozen! Onderweg naor huus hewwe in de Plus van Borne wat bosschoppen daon. Jelle drokt aanst de kaant en klaore maoltieden in de magnetron, want Jelle gaot ieder jaor weer over de magnetron. Dat kan hij goed!
  Maendagaovend hewwe hier de hiele aovend praot over de roman daor ak op et ogenblik zo now en dan an warke. Misschien doewe dat vanaovend wel weer Zoks is nuttig!
  Hieronder een foto van et kesteel Twickel.


Naor de volgende bladziede - Naor de veurige bladziede