12 feberwaori 17.00 In et weekaende hek weer warkt an een nije roman en ik gao zo now en dan ok es weer wat doen an een nije verhaelebundel as opvolger van Mit et waeter veur de dokter. Dat boek kot in. Ak dood gao wik dak in ieder geval 30 boeken naolaote. Now kan k vandaege vanzels nog wel dood gaon, dan hael ik dat niet. Mar as t me een betien mitzit, wik dat gewoon perberen. Ik moet vanzels wel wat daon hebben in dit leven. Dat betekent de kommende peer jaor nog hadde warken. Dat is vanzels allienig mar goed, een meens moet niet mar wat ommesuiselen. En... van hadde warken is nog nooit iene dood gaon, zee mien moeder altied. De teller staot now op 26 boeken. Daor komt de roman van dit jaor, Vroeger is veurgoed veurbij, dan nog bij. En dan de roman en de verhaelebundel daor ak an warke. En dan... nog een boek. Daor hek wel een konkreet idee over, mar ik vertelle dr nog niks van.
  Tussen de bedrieven deur volg ik vanzels oonze suksessen op e Olympische Winterspeulen. Ik kieke nooit naor sport, mar ik volge de Olympische Zoemer- en Winterspeulen wel altied. De goolden rees van Carlijn Achtereekte hek onderwegens op e autoradio volgd en de goolden rit van Sven Kramer hek thuus op e tillevisie bekeken. Krek as vandemiddag de ok al goolden rit van Ireen Wst op e 1.500 meter. Hiel mooi! Ik bin vanzels slim chauvinistisch! Wij moen winnen! Dr zullen now ok wel weer mierkerds wezen die vienen dat de keuning him te enthousiast en niet keuninklik genoeg gedreegt. Ik vien et prachtig dat de man zo mitleeft! Hieronder Carlijn Achtereekte mit de keuning en Sven Kramer.


Naor de volgende bladziede - Naor de veurige bladziede