23 september 17.00 Ik wodde vandemorgen nao een malle droom wakker. Ik was in de auto onderweg naor huus mar wus niet meer waor mien huus was en waor ak woonde. Ik wus ok niet meer wie ak zels was. Over kleine weggies kwam ik uuteindelik bij een hotel. Daor vreug ik ak ok een kaemer kriegen kon. Dat kon wel mar ze wollen wel weten wie ak was en waor ak wegkwam. Mar dat wus ik niet. Doe zeden ze dat ze een dokter bellen zollen en doe wodde k wakker. Tsja... Wie bin ik en wat bin ik? Dat bin van die vraogen... Ik bin in ieder geval de man die vandemiddag een Dutch Apple Bread bakt het. Heerlik! Ik zal de gaasten die donderdag kommen dr op trakteren!
  Ik hebbe twie literaire thrillers lezen: de Noorse thriller Hartslag van Holt & Holt (breur en zuster Anne en Even Holt) en de Nederlaanse thriller De eetclub van Saskia Noort. Dat laeste boek is ok verfilmd. Hartslag mok eerst even inkommen, mar doe was et slim spannend. As twie pesjenten in een Noors ziekenhuus nao et inbrengen van een pacemaker wegraeken, ontdekt dokter Sara Zuckerman dat dr wat vreselik mis is mit de meerst bruukte pacemaker van de wereld. Argens op e wereld het iene een virus in et pacemaker-pergramme inbrocht en in plak van levens te redden gaon de pesjenten now dood. Wie is de moordener? De eetclub van Saskia Noort lest as een trein. Et gaot over een stokmennig echtperen die geregeld mit mekeer eten. Et is van dat rieke, anstelderige volk. Ze hebben onderling vanzels ok seks en et duurste is nog niet goed genoeg. Tutten van wieven. Et bin allegeer van die Gooise Linda en John de Mol types. Mien soort volk niet. Mar... misschien bin Linda en John in wezen best wel aorig. Dat week vanzels niet. En dan won dr twie leden van de eetclub vermoord. Wie is de moordener? Ik vien de Skandinavische thrillers mooier as de Nederlaanse thrillers. Stieg Larsson en Camilla Lckberg bin toch echt mooier en beter as Saskia Noort en Loes den Hollander. Krek zoas de Skandinavische en Britse thrillers as film ok vule mooier en beter binnen as de Nederlaanse films. Now ja, dat is mien miening.


Naor de veurige bladziede