8 december 17.00 De dag nao de ramp Alle ellende komt deur Windows 10 neffens de webmaster. Die is stoeken bleven in een update-pergramme. De webmaster het ok een protte perblemen mit Windows 10. Mien komputer kan weer opkallefaterd wodden, mar dan komt Windows 7 dr op. Dat schient toch beter te warken. Et zal allemaole wel. Ik begriepe al dat spul gewoon niet. Mien hassens pakken et niet op. Et bliekt dat alle fotos beweerd bleven binnen, mar pattie dingen die eerst wel wollen, willen op disse tiedelike komputer weer niet. Zokrek kwam trouwens de tiedinge dat mien mailadressen ok allemaole weer terechte binnen. Dit soort technische ellende ontregelt en beheerst mien leven hielemaole. Hadden ze die rommel mar nooit uutvunnen. Deur alle stress hek vandemiddag een ongelok mit de auto had. Dat ik bin naor mien gerage en Schadenet Van den Brug west. Ik leve nog, de auto wodt amkem weke woensdagmorgen maekt. Ik vertelle dr veerder niks van, ik schrieve dr wel een kollum over. Dat levert dan nog weer wat geld op in disse dure maond. Mar ja, dan komt dr een bericht van iene die mailt dat hij niet lange meer te leven het Hoe bitter kan dat leven wezen. En waor maek ik me dan drok omme?
  An et begin van de middag stapten hier drie marklopers naost huus omme. Ze zochten ekkels van de bomen uut de bos en atten die lekker op! Wat toch een mooi gezicht!

7 december 18.00 Dr is hier een ramp gebeurd Mien komputer dot niks meer. Jan de webmaster het him ophaeld en zal nog perberen as hij et spul weer an de praot kriegen kan. Ik hebbe now een aandere komputer, mar alles warkt aanders. Veur mij is et een hels kerwei om dat weer snappen te kunnen. Et is gewoon verschrikkelik. En wat ok verschrikkelik is, is dak van alles kwiet bin. Alderhaande fotos. Mar ok al mien mailadressen. Ik wete jim mailadressen dus niet meer. Meensken daor ak wel es mit maile, sturen jim me jim mailadres even toe? Wat een vreselike toestaand.

6 december 17.00 Vandemorgen hek de boeken die k niet verkocht hebbe op e marken van Mildam en Beetsterzwaog weerommebrocht naor de Schrieversronte in Berkoop. Ik hebbe mitien wat boeken van mezels veur de verkope mit naor huus neumen. Bij de Schrieversronte hebben ze now ok nog een stokmennig exemplaoren van mien laeste dichtbundel De overkaant van et waeter weerommehaeld uut een boekwinkel. Dat de bundel is now tiedelik ok weer in Berkoop te kriegen! Zo lange as et duurt!
  Ik wil in december een protte doen an mien hobbys. Mien verzaemeling grafiek/mythologie wik hielemaole opnij indielen. Daor bin k vandaege mit begonnen!

Naor de volgende bladziede - Naor de veurige bladziede