5 december 20.00 We zollen hier vandemorgen om negen ure in de auto stappen en een daggien naor Amsterdam gaon. Mar dat hewwe op et laeste mement toch niet daon. We gaon now vandaege over een weke naor Amsterdam. We bin dr vandaege op uut west om een mooie kastboom veur mij te kopen. Zoen ding daj niet in mekaander hoeven te zetten mit malle haokies en zo en waor de lochies al inzitten. Die kan k nao nijjaor zo onder de aarm nemen en naor boven brengen. We bin eerst naor Bos in Et Vene west. Niks! Doe biwwe naor Liwwadden gaon. Daor hewwe eerst in een allemachig grote fietsezaeke keken, want ik wil mien fiets inruilen. We hebben de laeste medellen bekeken. Vervolgens naor Intratuin. Vule beter as Et Vene, mar toch nog niet wat ak zocht. Vervolgens biwwe naor Tuinland an de Peizerweg in Grunningen gaon. Wat mooi, wat groot en wat was alles prachtig versierd! We hebben dr eerst waarme sukelaomelk mit slagroom en wat lekkers had. En doe et zuken naor een boom. Ik hebbe een prachtig boompien kocht mit slingers en ballen dr bij. Trouwens ok nog een azalea. Mit die dingen kan k nooit wat wodden, mar hij was in de uutverkoop We hebben in de binnenstad laeter nog wat kuierd en dronken. En doe naor huus. Daor dee blieken dak vergeten hadde en neem de huussleutel mit. Niet echt snugger. Dus naor Fokje, die het ok een sleutel. Mar Fokje was niet thuus. Doe naor Anke, die het een sleutel van Fokje heur huus. Ik hebbe twie sleutels mitkregen in de hoop dat dr iene van passen zol. En ja!!! Doe het mien kammeraod de kastboom uutpakt en versierd. Prachtig! Ik mos wel een keer heuren: Wat ben jij toch vreselijk onhandig! Et is de bittere waorhied. Vervolgens biwwe weer in de auto stapt en naor Van der Valk in Wolvege reden. Daor hewwe zokrek heerlik waarm eten had! En now gao k vanaovend lekker bij de kastboom naor Midsomer Murders kieken op BBC First. Hieronder de versiering in Tuinland in Grunningen.


Naor de volgende bladziede - Naor de veurige bladziede