2 jannewaori 17.00 Vandemiddag bink nog even bij de huusdokter west angaonde de last die k van de ogen hebbe. De boel is wat ontsteuken, dat ik hebbe aandere ogedruppen kregen. In verbaand mit de daarmziekte die him niet echt daelegeven wil, moet dr maendag weer bloed prikt wodden. Wat toch een gedoe. De schriever het wel es fitter west
  Ik hebbe de verhaelen rippeteerd die k morgen vertellen zal tiedens et eerste optreden in dit nije jaor. Een schoffien leden vreug een vrommes me tiedens et schoft van een optreden ak zoks wel es vaeker dee. Och, now ja zo now en dan es. Et wodt morgen optreden nommer 2938. Hieronder een foto van 16 september 1999. Ik moch die aovend veur de 1500ste keer vertellen en dat was veur de plattelaansvrouwluden in Haddegeriep. As grote verrassing kwammen Schrieversronte-veurzitter Klaas van Weperen en ponghoolder Fettje Alten me in et schoft een prachtig boeket bloemen brengen. Zo te zien biwwe gien jaor oolder wodden!


1 jannewaori 17.00 Gisteraovend hewwe in Et Vene vanzels naor Youp keken. Pattie meensken vienen him te grof, mar ik vien et toch altied slimme knap hoe hij et jaor overeidet. Nao middernaacht hewwe wat volk op e diek bij Haarm en Jacob et nijjaor ofwunnen. Ik was om kwat veur twieje thuus en doe hek de beide lease-poezen Boris en Joris uut de gerage haeld en nog even in huus laoten. Ze weren doodsbange veur alle geknal, dat ik hadde ze veurdak votgong opsleuten in de gerage. Aanders weren ze lichtkaans an et zwarven raekt. Wat is die knalderije een ellende veur zokke dierties. Et mag wat mij anbelangt sebiet verbeuden wodden. Ik hebbe dr nog nooit ok mar iene cent an uutgeven. Zunde van de centen! Alhoewel et siervuurwark mooi is om te zien.
  Ik bin trouwens in jaoren niet zo gammel et nije jaor ingaon. De daarms die nog niet hielemaole willen zoas ik et wil en sund de kastdaegen hek braanderige, stikkende ogen. Dat hek de laeste drie jaor wel es een inkelde keer, mar et is now even hiel vervelend. Ik hebbe oogdruppen en ooggel. Ik hope toch dat et gauw bekomt.
  Vandaege hek de kastboom weer ofbreuken en naor de zoolder brocht en de elf ammarillen staon weer mit vasse potgrond en drinken op e veensterbaank in mien warkkaemer. En now mar waachten totdat dr knoppen inkommen zullen!

Naor de volgende bladziede - Naor de laeste bladziede 2014